Studimi: Një në pesë pacientë Covid-19 u diagnostikuan me çrregullime psikiatrike 0 79

Një studim i ri i botuar në revistën mjekësore The Lancet Psychiatry tregon se COVID-19 mund të ketë lidhje me një sërë efektesh të shëndetit mendor te pacientët.

Sipas studimit, të kryer nga studiues nga Universiteti i Oksfordit, diagnoza e COVID-19 ishte e lidhur me rritjen e incidencës së diagnostikimit me disa gjendje psikiatrike dhe çrregullime duke përfshirë ankthin, pagjumësinë dhe demencën.

Studiuesit thanë se pasojat e shëndetit mendor për të prekurit nga COVID-19 nuk janë matur ende me saktësi – por janë parashikuar gjerësisht.

“Ne ishim të interesuar kryesisht në pyetjen, nëse njerëzit që ishin diagnostikuar me COVID-19 do të ishin në rrezik më të madh të zhvillimit të çrregullimeve të shëndetit mendor”, tha profesori i Universitetit të Oksfordit Paul Harrison, i cili punoi në studim.

Studiuesit u përpoqën t’i përgjigjen kësaj pyetjeje duke parë ritmet e diagnozave psikiatrike tek pacientët, deri në tre muaj pasi ata ishin diagnostikuar me COVID-19, tha Harrison.

Grupi përdori TriNetX Analytics Netëork, i cili mbledh të dhëna nga regjistrat elektronikë mjekësorë nga 54 organizata të kujdesit shëndetësor në SHBA. Kjo përfshin të dhëna për 69.8 milion pacientë – 62.354 prej të cilëve u diagnostikuan me COVID-19 midis 20 janarit dhe 1 gushtit. Ata më pas panë, se sa prej këtyre pacientëve ishin diagnostikuar me një çrregullim psikiatrik.

Për krahasim, studiuesit gjithashtu matën shkallën e diagnozave të çrregullimeve psikiatrike në pacientët që përjetuan gjashtë gjendje të tjera shëndetësore si gripi, infeksionet e traktit respirator ose një frakturë të madhe të kockave.

“Eshtë e rëndësishme të përpiqesh të dallosh atë që mund të jetë për shkak të vetë COVID, dhe atë çfarë mund të jetë për shkak të mjedisit ku po jetojmë”, shpjegoi Harrison.

Ai tha se rreth 6% e pacientëve me COVID-19 të cilët kurrë nuk ishin diagnostikuar me një çrregullim psikiatrik më parë, u diagnostikuan me një të tillë brenda tre muajve nga prekja prej COVID-19. Gjendja më e zakonshme, përsëri, ishte ankthi.

Harrison tha se ekzistojnë dy shkaqe të mundshme të çrregullimeve psikiatrike të shoqëruara me COVID-19. “Një mundësi është që mund të ketë ndonjë efekt të drejtpërdrejtë të virusit që prodhon simptomat. Ndoshta ajo që virusi mund të jetë duke bërë në tru tek disa njerëz, ose mënyra se si sistemet imune të disa njerëzve janë përgjigjur për të luftuar virusin,” tha ai.

“Ka disa aludime, që mund të ketë një shpjegim biologjik për disa njerëz.”

Shkaku tjetër i mundshëm mund të jenë reagimet psikologjike që njerëzit kanë, pasi diagnostikohen me virusin, tha Harrison.

“Reagimet psikologjike që njerëzit kanë kur preken nga COVID, pasi shqetësohen për jetën e tyre ndoshta për herë të parë, pasi shqetësohen për të ardhmen – në një farë mënyre, COVID thjesht po vepron si një ngjarje tjetër e madhe stresuese, dhe jo si ndonjë efekt i drejtpërdrejtë viral,” tha ai.

Krahasuar me gjashtë sëmundjet e tjera dhe gjendjet shëndetësore, COVID-19 shkaktonte më shumë diagnostikime të çrregullimeve psikiatrike, sipas studimit.

“Eshtë e mundur të spekulohet se në këtë moment, je më i stresuar kur dikush të thotë se ke COVID, sesa do të ishe nëse dikush do të të thoshte se ke shumë gjëra të tjera në lidhje me shëndetin”, tha Harrison.

Harrison tha se ka ende shumë pyetje për t’u përgjigjur pas studimit të Oksfordit. Ai gjithashtu tha se mendon që njerëzit e diagnostikuar me një çrregullim psikiatrik pasi diagnostikohen me COVID-19, mund të shërohen prej tij.

“Nëse shihni pothuajse çdo shkak tjetër të ankthit dhe depresionit që mund të mendojmë, një pjesë e konsiderueshme e njerëzve bëhen më mirë, ose me kalimin e kohës dhe / ose me trajtime,” tha ai. “Në praktikën time klinike, tek të mbijetuarit e COVID që kam parë, unë kam parë disa njerëz që vijnë duke u përmirësuar dhe disa që nuk janë qartësisht të përmirësuar.”

“Unë dyshoj se do të ketë një sërë rezultatesh dhe do të na duhen studime afatgjata ku ne mund t’i masim me kohë,” vazhdoi ai.

Harrison tha se pjesa e dytë e studimit të Oksfordit ishte: A janë më të rrezikuar njerëzit që kanë tashmë një diagnozë psikiatrike, të preken prej COVID-19, sesa njerëzit pa një diagnozë psikiatrike?

“Për habinë time, përgjigjja është po”, tha Harrison. “Njerëzit të cilët kishin një diagnozë psikiatrike në vitin para se të vinte COVID … ata ishin rreth 65% më të prirur të infektoheshin nga COVID sesa njerëzit pa diagnozë psikiatrike”.

Harrison tha se ai dhe kolegët e tij ishin të habitur nga kjo gjetje. “A është kjo vetëm sepse njerëzit me probleme psikiatrike kanë tendencë të kenë probleme më të rënda të shëndetit fizik?” pyet ai./bota.al

Leave a Reply

Your email address will not be published. Required fields are marked *

Jetesa në Korenë e Veriut, Kim Jong-un e pranon: Po përjetojmë një situatë të tensionuar 0 16

Si rrallëherë, lideri i Koresë së Veriut, Kim Jong-un, ka pranuar se situata ushqimore në vendin e udhëhequr prej tij është e tensionuar.

Kështu të paktën ka deklaruar mediat shtetërore në Veri, ku thekson, se alarmi është dhënë duke pasur parasysh edhe ‘zinë e urisë’ që kaploi vendin në 1990, e situata ishte vërtetë alarmuese. Koreja e Veriut, vuan nga një mungesë sistematike e ushqimit, e në vitin e fundit, përshirë pandeminë dhe përmbytjet e shumta, situata është bërë akoma dhe më e vështirë.

Duke folur në një takim plenar të Komitetit Qendror të Partisë së Punëtorëve, sipas agjencisë zyrtare KCNA, Kim tha se ekonomia është përmirësuar këtë vit, me prodhimin industrial me 25% krahasim me vitin e kaluar.

“Situata ushqimore e njerëzve po tensionohet pasi sektori bujqësor nuk arriti të përmbushë planin e tij të prodhimit të drithërave për shkak të dëmtimit nga stuhitë e vitit të kaluar”, mësohet të ketë thënë Kim.

Shpërthejnë sërish tensionet, Izraeli sulmon Gazën pas lëshimit të balonave të zjarrit 0 12

Izraeli filloi sulme ajrore në Gaza pasi militantët palestinezë lëshuan balonë zjarrëvënës në Izraelin jugor, njoftoi ushtria izraelite. Shpërthimet në Gaza u dëgjuan në orët e para të së mërkurës (16 qershor).

Ky është sulmi i parë që nga arritja e armëpushimit që u dha fund luftimeve 11 ditore, muajin e kaluar.

Forca e Mbrojtjes së Izraelit (IDF) tha se avionët e saj luftarakë goditën “përbërësit ushtarakë që i përkisnin organizatës terroriste Hamas”.

Balonët e zjarrit kanë shkaktuar rreth 20 zjarre në Izraelin jugor, thanë zjarrëfikësit lokalë.

Ushtria izraelite tha se është e gatshme për të gjitha skenarët “përfshirë rifillimin e luftimeve përballë akteve të vazhdueshme terroriste që vijnë nga Gaza”.

Burimet palestineze të cituara nga AFP-ja thanë se forca ajrore e Izraelit shënjestroi të paktën një vend në lindje të Khan Yunis në jug të Rripit të Gazës.

Nuk kishte asnjë informacion për viktima. Në Gaza jetojnë rreth 2 milionë banorë.

Incidentet erdhën pasi grupet e ekstremit të djathtë në Izrael mbajtën një marsh kontrovers në Jerusalemin Lindor më 15 qershor. Qindra nacionalistë brohorisnin “vdekje për arabët”.

Marshimi vjetor që shënon kapjen e Jerusalemit Lindor më 1967 zakonisht kalon përmes lagjes myslimane, por autoritetet izraelite ndryshuan rrugën për të shmangur zonën.

Palestinezët e shohin marshin si provokim ndërsa Fatah e Hamas, dy organizatat më të mëdha palestineze, kanë bërë thirrje për “ditë të zemërimit” në Gaza dhe Bregun e pushtuar Perëndimor.

Mbajtja e këtij marshimi ishte një sfidë për kryeministrin e ri të Izraelit, Naftali Bennett.

Ai morën detyrën më 13 qershor dhe i përket krahut nacionalist të vijës së ashpër.

Bennett e mori detyrën nga ish-kryeministri Benjamin Netanyahu, i cili u rrëzua nga pushteti pas 12 vjetësh.

Qeveria e autorizoi mbajtjen e marshimit, pavarësisht se kishte shqetësime se do të mund të rriste tensionet.

Bennett dhe koalicioni i tij do të ishin kritikuar për kapitullim para Hamasit nëse qeveria do ta anulonte atë.

Nga luftimet në muajin maj mes Izraelit dhe militantëve të Hamasit mbetën të vrarë 260 palestinezë, përfshirë disa luftëtarë, thanë autoritetet e Gazës. Në Izrael, 13 njerëz u vranë, duke përfshirë një ushtar, nga raketa të lëshuara nga Gaza, thanë policia dhe ushtria.

Izraeli, SHBA-ja, BE-ja dhe vende tjera e konsiderojnë Hamasin si organizatë terroriste./REL