Ceferin, letër Infantinos: Të ndryshojë rregullimi i prekjes së topit me dorë

0 26

Presidenti i FIFA-s, Gianni Infantino mori një kërkesë (me anë të një letre) nga presidenti i UEFA-s, Aleksander Ceferin, për ndryshimin e rregullit për prekjen e topit me dorë, që është aktualisht në fuqi.

Ceferin dëshiron të ndryshojë rregullin në mënyrë që të ketë më shumë fleksibilitet ndaj lojtarëve dhe arbitrave, duke pasur parasysh që në këtë moment shumë lojtarë janë ndëshkuar edhe për prekje të pavullnetshme të topit me duar.

“Përpjekja për të përcaktuar me rigorozitet kur prekja e topit është një gabim që duhet ndëshkuar ka çuar në shumë vendime të padrejta, që janë pritur me zhgënjim dhe shqetësim nga komuniteti i futbollit. Fryma e lojës duhet të ruhet në çdo kohë. Unë besoj se kthimi te formulimi i mëparshëm, ndoshta i rishikuar dhe i plotësuar nga një dispozitë që nuk lejon shënimin e golave ​​me dorë ose krah, është një opsion për t’u marrë në konsideratë.”

Këto janë fjalët e Ceferin, i cili kërkon ndihmë nga Infantino, pasi UEFA nuk ka asnjë rol në ligjet e lojës, pavarësisht drejtimit të garës më të rëndësishme të klubeve në botë, Champions League, dhe kampionateve më të njohura kombëtare në kontinent. Bordi Ndërkombëtar i Shoqatës së Futbollit kontrollohet nga FIFA.

“Ndodh shpesh që topi godet aksidentalisht duart ose krahët e lojtarëve, por fryma e ligjit është e qartë se, duke qenë raste të tilla të pashmangshme, ata nuk duhet të ndëshkohen për të shmangur copëzimin e tepërt të lojës dhe gjithashtu për të lejuar që situata të rrezikshme të vendosin rezultatin e ndeshjeve. Përdorimi i VAR-it në shumë gara thjesht ka përkeqësuar problemin dhe i shtyn gjyqtarët dhe mediat të zbërthejnë çdo situatë, me efekte paranojake dhe rezultate të diskutueshme”.

Ky është mendimi i sllovenit Ceferin dhe rrjedhimisht i të gjithë UEFA-s. Ndoshta, prandaj, së shpejti do të ketë një diskutim të ri ndërkombëtar mbi faullet e shkaktuara nga prekja e topit me dorë. /T.Ch

Leave a Reply

Your email address will not be published. Required fields are marked *

Mesazhi i parë i Janullatos pas daljes nga spitali: Dashuria, gjëja më e vyer që ekziston në botë! (Ja politikanët që përmend) 0 5

Kryepeshkopi Anastas Janullatos ka fituar betejën me virusin e rëndë Covid-19, pas disa ditësh i shtruar në një spital të Athinës, në Greqi. Ai ka lënë sot spitalin, ndërsa Kisha Orthodhokse Autoqefale e Shqipërisë thekson se Janullatos do të vazhdojë trajtimin mjekësor të nevojshëm në shtëpi, në Athinë.

Në mesazhin në “Facebook” të publikuar nga Kisha Autoqefale, Kryepeshkopi Janullatos shpreh mirënjohjen e tij për mjekët dhe infermierët e Pavijonit të Terapisë Intensive, ndërsa falënderon Perëndinë për ecurinë e kësaj sprove të rëndë.

Mesazhi i plotë:

Kryepiskopi Anastas del nga Spitali
Falënderimet e tij të përzemërta
Kryepiskopi i Tiranës, Durrësit dhe i gjithë Shqipërisë, Anastasi, pas një trajtimi mjekësor dymbëdhjetëditor në Pavijonin e Terapisë Intensive të Spitalit “Evangelismos”, do të vazhdojë trajtimin mjekësor të nevojshëm në shtëpi, në Athinë.
Duke lavdëruar Perëndinë për ecurinë e kësaj sprove të rëndë, Kryepiskopi shpreh mirënjohjen e tij për mjekët dhe infermierët e Pavijonit të Terapisë Intensive, nën drejtimin e profesoreshës znj. Anastasia Kotanidhu.
Fortlumturia e Tij falënderon nga thellësia e zemrës për urimet vëllazërore shumë të vyera Tërëshenjtërinë e Tij, Patriarkun Ekumenik, z. Vartholome; Fortlumturitë e tyre, patriarkët e Aleksandrisë, z. Theodhor; të Antiokisë, z. Joan; të Jeruzalemit, z. Theofil; të Moskës, z. Kirill; Fortlumturitë e tyre, Kryepiskopin e Qipros; z. Krisostom dhe të Athinës, z. Jeronim, si edhe shumë hierarkë të tjerë të shtrenjtë. Kryepiskopi falënderon ngrohtësisht Hirësinë e Tij Bujar Spahiu, Kryetar i Komunitetit Mysliman, Kryegjyshin Bektashian, Haxhi Dede Edmond Brahimaj, Arqipeshkvin Mitropolitan të Shkodrës, Mons. Anxhelo Masafra.
Ai shpreh falënderime të ngrohta për mbështetjen e ngrohtë të Shkëlqesive të tyre, për Presidentin e Republikës së Shqipërisë, z. Ilir Meta; për Kryeministrin, z. Edi Rama; për Presidenten e Republikës së Greqisë, znj. Ekaterini Sakelaropulu; Kryeministrin, z. Kiriako Mitsotakis; për ish-presidentët e Republikës së Greqisë, z. Prokopi Pavlopulos dhe z. Kristo Sarcetakis; për kryetarin e Opozitës Parlamentare, z. Aleksi Cipras; për ish-kryeministrin, z. Andonis Samaras; për ministrat z. Niko Dendias dhe Miltiadhis Varvitsiotis; për z. Miki Theodhoraki, për Kryetarin e Kuvendit të Shqipërisë, z. Gramoz Ruçi; për kryetarin e Bashkisë së Tiranës, z. Erion Veliaj; për kryetarin e PBDNJ-së, z. Vangjel Dule; për gazetarë shqiptarë dhe grekë.
Gjithashtu, falënderon me të gjithë zemrën miqtë e panumërt, klerikë dhe laikë, të njohur dhe të panjohur, që e mbështetën me lutjet e përzemërta dhe me shprehjet spontane të dashurisë së tyre gjatë kësaj kohe.
Pjesëmarrja e heshtur në vuajtjen e popullit të Perëndisë ndihmon në mënyrë mistike në arritjen e kohezionit social. Dashuria spontane e sinqertë gjithmonë fal fuqi në çastet e vështira të njerëzve. Dashuria është gjëja më e vyer që mund të ekzistojë në botë.
Nga Sekretaria e Sinodit të Shenjtë
Tiranë, 23 nëntor 2020 //B.W

Sektori i vizave dhe pasaportave, ambasada e Gjermanisë tjetër njoftim të rëndësishëm për qytetarët shqiptarë 0 4

Ambasada Gjermane Tiranë njoftoi qytetarët se prej kësaj të hëne sektori i vizave dhe pasaportave është hapur sërish me kapacitet të kufizuar.

“Por numri i aplikimeve, që përpunohen çdo ditë, do të reduktohet. Për pasojë do të ketë detyrimisht shtyrje të orareve dhe datave të aplikimeve. Personat e prekur nga këto masa do të njoftohen personalisht. Por kjo mund të kërkojë disa javë. Ndërkohë shpërndarja e pashaportave të pajisura me vizë vijon në segmentet e zakonshme kohore. Lutemi të mbahet në konisderatë, që deri në një njoftim të dytë nuk mund të bëhen legalizime”, sqaroi ambasada.

Po ashtu, Ambasada shprehet se këto masa merren për të mbrojtur shëndetin e aplikuesvee dhe të punonjësve.

“Synimi ynë është ruajtja e sigurisë në shërbim dhe mundësisht shmangja e një mbylljeje të plotë të Zyrës së Vizave për shkak të rasteve Covid-19. Për këtë qëllim na duhet të marrim masat përkatëse”, përfundon njoftimi i Ambasadës Gjermane në Tiranë.//B.W